Er Kópavogur barnfjandsamlegur?

Sit og hlusta á hádegisfréttir RÚV að gömlum vana.
Fyrsta fregnin er um rosalega aukningu á miður góðum málum tengdum börnum og unglingum í Kópavogi, afbrotamál þeim tengd aukist um tugi prósenta og kynferðisafbrotamál á annað hundrað prósent!?
Jújú, bærinn í mikilli sókn, íbúum fjölgar og fjölgar og allt það, en slíkt hefur verið að gerast víðar, í Hafnarfirði, Garðabæ og austur á landi.
Með það í huga og kannski fleiri staðreyndir um stjórnunina í Kópavogi, þá get ég nú ekki varist þessari spurningu sem er fyrirsögn færslunnar!
Svo á ég líka vissra hagsmuna að gæta, á þrjár yndislegar bróðurdætur sem búa þarna og eiga tvær þeirra samtals sex ung börn!
EF áðurnefndir staðir greina svipaða þróun hjá sér, kann þetta að hluta að vera eðlilegt, svo langt sem það nær að slík vandamál geti talist sem slík. En hvort heldur sem er þarf einhver að taka sig taki, yfirvöld í Kópavogi eða víðar um land.
Hefur líklega sjaldan eða aldrei verið eins mikilvægt að hlúa að fjölskyldugildunum eins og nú, Ísland orðið meira og meira opið fyrir öllum straumum og stefnum umheimsins, þar með talið þeim verstu eins og dæmin sanna og þessi þróun með börn og unglinga í Kópavogi bendir til.