Garpur orðs og æðis!

Mér brá satt best að segja mjög í brún er ég las um andlát Hákonar Aðalsteinssonar sl. laugardagskvöld, en þá um morgunin hafði systursonur hans og bloggvinur vor, Víðir Benediktsson, sett niður nokkrar línur um farin frænda!

sailor.blog.is.

Hákon þekkti ég því miður ekki persónulega, hef þó haft tækifæri til er við höfum mæst á förnum vegi eða verið staddir í sama húsi, að heilsa upp á hann, en að því varð bara ekki. Hins vegar vissi hann örlítið af þessum strák á Akureyri er tekin var að belgja sig eitthvað á velli bragfræðinnar, því "sá stutti" hafði nefnilega eitt sinn gerst svo djarfur að senda með móður sinni lítinn barning í tækifærisskyni ortan. Var tilefnið að Hákon var fararstjóri í ferð frá Akureyri alla leið austur til Eiða!
Hljómaði þetta nokkurn vegin svona.

Upp til hæstu heiða,
hjörð ein vill nú skeiða,
með Konna "kjaftagleiða",
fremst í sinni för.
Skal hann allt til Eiða,
úr öllum málum greiða,
fjör má og fram reiða,
skrýddur skáldaspjör!

Tók Hákon framtaki stráksins vel og stóð auðvitað undir væntingum!
En þótt kynni hafi ekki orðið persónuleg, þekkti ég vel til verka Hákonar, á ljóðabækurnar hans og bók Sigurdórs sömuleiðis og ótal skipti var ég viðstaddur eða hlýddi á í útvarpi, hagyrðingamót þar sem Hákon tók þátt og fór á kostum með fleiri snillingum! Þar sýndi hann líka oft hve mikill sagnamaður hann var líka, hélt fólki hugföngnu með afbragðsstíl og sinni djúpu og góðu röddu!
Og ættingjar hans ýmsir hafa svo orðið mér kunnugir og það allt frá því ég var barnungur. nefni ég þar helst, að systir hans hún Sída, Sigrún, var lengi húsvörður í íþróttahúsi Glerárskóla þangað sem ég kom snemma. Stórmerkileg og góð kona og vel hagmælt sem svo margir úr fjölskyldunni af Jökuldalnum!Nýtilkomin tengsl við Víði son hennar nefndi ég hér að ofan og annar frændi, sá landsþekkti grallari með meiru, Haffi helga, líka nokk svo kunnugur.Þá má þess geta, að einn frændin til, Örlygur Hnefill, er sömuleiðis frændi minn og fleira gæti ég nefnt.
Ýmsar vísur Hákonar hafa mér líkt og svo mörgum öðrum orðið minnistæðar og jafnvel fest þar.
á einu hinna fjölmörgu hagyrðingamóta, voru Hákon og fleiri einmitt látnir yrkja eftirmælavísur. Og það sýndi vel hve Hákon hafði mikla kímnigáfu og þá ekki hvað síst fyrir sjálfum sér í bland við vissa hógværð, að hans útgáfa varð á eftirfarandi nótum.

Hákon var þekktur, það er jú rétt
og þegar hann dó var það ljómandi frétt.
Þeir grétu hann eigi, en glottu við tönn
og grófu hann mitt í dagsins önn.

held að þetta hafi verið á Vopnafirði, -Með íslenskuna að vopni- Vopnaskak, er lengi er eða hefur verið haldið á Vopnafirði undir stjórn menningarfrömuðarins Sigríðar Dóru Sverrisdóttur!?
Hákon var sannarlega Garpur bæði til orðs og æðis og verður öllum minnistæður er honum hafa kynnst á einn eða annan hátt.
Blessuð sé hans minning og sendi ég ættingjum hans hugheilar samúðarkveðjur.

Hákon Aðalsteinsson látinn

Athugasemdir

[Húnbogi Valsson (IP-tala skráð) 9.3.2009 kl. 20:21]

Þetta er harmafregn og mikill skaði. Ég þekkti Hákon, vorum eitt sinn vinnufélagar.

[Magnús Geir Guðmundsson, 9.3.2009 kl. 22:32]

Þú segir ekki Húnbogi, þá er ég ekki hissa þótt blundi í þér bragarkorn annars lagið!En við hvað unnið þið saman, kannski í löggunni á Húsavík? Og skildi snillingurinn hafa ort um þig eina eða tvær?

[Húnbogi Valsson (IP-tala skráð) 10.3.2009 kl. 09:36]

Í byggingavinnu á Húsavík, sem ég stundaði flest unglingsárin. Hann ók steypubíl, milli þess sem hann starfaði í lögreglunni. Ég var líka í steypustöðinni og vann við að fylla á bílana. Hann átti til að gera vísur um vinnufélagana, sérstaklega tvíræðar gamanvísur um stúlkur sem voru í sumarvinnu. Hann dundaði sér við að breyta "rússajeppa" (UAZ) í húsbíl, sem hann sagðist ætla að nota við hreindýraveiðar. Ég segi þetta vegna þess að sá bíll (að ég tel fullvíst) stendur núna við næstu götu, ógangfær að vísu, og mynnir mig alltaf á Konna. Hann rak líka Shell bensínstöðina á Húsavík, ásamt þáverandi sambýliskonu og var þá gjarnan spjallað þegar tekið var bensín. Ég mynnist þess ekki að hann hafi gert vísu um mig.

[Magnús Geir Guðmundsson, 10.3.2009 kl. 16:38]

Takk kærlega Húnbogi, virkilega gaman að heyra þetta um ykkar samskipti og um störf garpsins fallna.

Frændi hans Víðir Ben, sailor.blog.is minnist einmitt á svona dund hjá honum að gera gamla hluti upp til endurnýjaðarar notkunnar, merkilegt þetta sem þú svo segir með bílinn þarna í næstu götu, fortíðin svona að koma aftur til þín.

[Einar Bragi Bragason., 15.3.2009 kl. 17:35]

Hákon var snillingur